Kuri uyu munsi tariki 15 Ukwakira 2023, u Rwanda rwifatanyije n’Isi kwizihiza umunsi mpuzamahanga w’umugore wo mu cyaro, by’umwihariko ku rwego rw’Akarere ka Muhanga uyu munsi wizihirijwe mu mudugudu wa Cyanika, Akagari ka Masangano mu Murenge wa Nyabinoni.

Ni umunsi ufite insanganyamatsiko igira iti "Dushyigikire iterambere ry’umugore wo mu cyaro"

Umunsi Mpuzamahanga w’umugore wo mu cyaro witabiriwe n’ Umuyobozi w’Akarere Madamu KAYITARE Jacqueline, Umugenzuzi wungirije w’Urwego rw'Igihugu Rushinzwe Kugenzura Iyubahirizwa ry'Ihame ry'Uburinganire n'Ubwuzuzanye bw'Abagabo n'Abagore mu Iterambere ry'Igihugu, Umuyobozi w'Akarere wungirije Ushinzwe imibereho myiza Bwana Mugabo Gilbert, abagize inama Njyanama, Umuyobozi muri Komite y’Inama y’Igihugu y’Abagore ku rwego rw’Intara no ku rwego rw’Akarere, abafatanyabikorwa b'Akarere n'abandi bayobozi batandukanye.

Ibirori byo kwizihiza umunsi mpuzamahanga w’umugore wo mu cyaro, mu Karere ka Muhanga  byaranzwe no gusezeranya imiryango yabanaga mu buryo butemewe n’amategeko, kumurika bimwe mu bikorwa by’abagore harimo iby’ubuhinzi n’ubworozi, iby’ubukorikori, kugaburira abana indyo yuzuye ndetse habaho no kuremera imiryango itishoboye.

Mu ijambo Umuyobozi w’Akarere yagejeje ku bitabiriye ibirori by’uyu munsi yashimiye imiryango cumi n’ine yafashe icyemezo cy’indashyikirwa cyo gusezerana imbere y’amategeko yasabye kandi imiryango ibana itarasezeranye gutera iyi ntambwe na yo igasezerana kuko birengera abasezeranye ndetse bikarengera n’abana.

Umuyobozi w’Akarere yavuze ko Umudugudu w’Amasangano ari umudugudu udasanzwe kubera ibikorwa wiyemeje bizawufasha kuba umudugudu w’indashyikirwa ku rwego rw’Intara. Umuyobozi w’Akarere yagarutse kuri bimwe muri ibyo bikorwa birimo kuba umudugudu uzira ubukene, umudugudu uzira amakimbirane, umudugudu ugomba gukora ibikorwa bigaragarira buri wese, umudugudu ugomba kugira imiryango ibana mu buryo bwemewe n’amategeko n’ibindi.

Umuyobozi w’Akarere ati:"Dushime cyane Umukuru w’igihugu cyacu wahaye umugore ijambo, dukwiye kuvuza izi mpundu kuko Umukuru w’Igihugu cyacu yaduhaye agaciro ariko natwe tukamuha isezerano ko tutazakamutesha."

Yavuze ko umukuru w’Igihugu yifuza ko Umugore wo mu cyaro atera imbere, agateza imbere n’umuryango arimo, akabana neza n’umugabo we, akamushyigikira mu bikorwa biteza imbere umuryango.

Mbere yo gusoza ibi birori Iyi miryango yasezeranye yaremewe, ihabwa Matelas ndetse ikorerwa ubusabane n'Ubuyobozi.

Muri ibi birori kandi imiryango itanu iyobowe n'abagore iri ku rutonde rwa Girinka yagabiwe inka ndetse umugore witeje imbere ahabwa gaz izajya imufasha mu guteka.