Kuri uyu wa gatandatu, tariki ya 28 Gicurasi 2022, Guverineri w’Intara y’Amajyepfo Madamu KAYITESI Alice yifatanyije n’abaturage mu muganda rusange usoza ukwezi kwa Gicurasi 2022, wabereye mu Mudugudu wa Kantonganiye, Akagari ka Nyamirama mu Murenge wa Muhanga ku rwego rw’Intara y’Amajyepfo.

Guverineri KAYITESI Alice yifatanyije n’abaturage mu muganda wo kurwanya isuri

Uyu muganda, wari wanitabiriwe na Hon. Deputé KALINIJABO Barthelemy, Ubuyobozi bw'Akarere, Inzego z'umutekano n'abandi bayobozi mu nzego zitandukanye; waranzwe no gucukura imirwanyasuri mu rwego rwo kurwanya isuri no kubungabunga ibidukikije. Umuganda rusange kandi, wakozwe no mu yindi Mirenge yose, wibanda ku bikorwa nk'ibi, byo kurwanya isuri, kubakira abasenyewe n'ibiza batishoboye ndetse n'ibindi.

Nyuma y'umuganda, Abayobozi bagiranye ikiganiro n'abaturage ku ngingo ku ngingo zitandukanye, zirimo n’ubukangurambaga ku kwishyura Mituweli (2022-2023), ubutumwa bwa Minisiteri y’Ibidukikije bujyanye no kwizihiza Umunsi Mpuzamahanga w'Ibidukikije n’ubutumwa bw’Ikigo cy’Imisoro n’Amahoro bukangurira AbaturaRwanda gusaba inyemezabwishyu ya EBM.

By’umwihariko, Guverineri KAYITESI Alice yanaboneyeho gushishikariza abitabiriye umuganda kugira umuco w'isuku n'isukura ku mubiri, mu ngo, ahabakikije ndetse n'isuku y'amatungo. Ubutumwa nk’ubu, bwanatanzwe mu Mirenge yose nyuma y’umuganda.

ANDI MAFOTO Y’UMUGANDA WABEREYE MU MURENGE WA MUHANGA

Yanditswe na:

UWINGABIRE Dieudonné (Ag.PRO)