Kuri uyu wa kabiri tariki ya 18 Ukwakira 2022 mu Bigo by’amashuri bya G.S.Kabgayi B na G.S.St Joseph Kabgayi, niho hatangirijwe icyumweru cy’uburezi ku rwego rw’Intara y’Amajyepfo. Iki gikorwa kitabiriwe na Guverineri w’Intara y’Amajyepfo Madamu KAYITESI Alice, Umuyobozi Mukuru wa REB, Umuyobozi w’Akarere ka Muhanga, Intumwa ya NESA, Abajyanama b'Akarere, Inzego z'umutekano n'abandi bafatanyabikorwa batandukanye.

Guverineri KAYITESI Alice, DG/REB, Mayor KAYITARE Jacqueline n’abandi bayobozi mu nzego zitandukanye bitabiriye igikorwa cyo gutangiza icyumweru cy’uburezi

DG wa REB agaburira abanyeshuri bo muri G.S. Kabgayi B

Muri iki cyumweru cyatangijwe uyu munsi; Amatsinda ahuriweho n’inzego zitandukanye, azasura Ibigo by'Amashuri bitandukanye mu Mirenge yose, hagamijwe kugenzura ishyirwamubikorwa ry'amabwiriza yashyizweho ajyanye n'uruhare rw'ababyeyi mu kwishyura umusanzu w'ishuri, imyigishirize y’abarimu, Uburere abanyeshuri bahabwa, ubwitabire bwabo umunsi ku munsi ndetse n'izindi gahunda zigamije kuzamura ireme ry'uburezi.

Guverineri KAYITESI Alice agaburira abanyeshuri bo muri G.S.Kabgayi B

Atangiza iki gikorwa; Guverineri w’Intara y’Amajyepfo Kayitesi Alice yasabye abanyeshuri kwiga bashyizeho umwete, yibutsa abarezi ko bakwiriye gukundisha abana amasomo batanga. Yabasabye kandi kutihererana ibibazo ahubwo bagafatanya n’inzego z’ibanze kubikemura.

Muri iki cyumweru cy’uburezi kandi, Abarezi bazakomeza gushishikarizwa gukoresha ikoranabuhanga mu gihe bagiye gukora ubushakashatsi mu mitegurire y’amasomo batanga.

Kugeza ubu, mu Ntara y’Amajyepfo ubwitabire bw’abanyeshuri mu bigo bya Leta bugeze kuri 98,9%, utabariyemo bo mu mwaka wa 1 ndetse ni uwa 4.

Yanditswe na:

UWINGABIRE Dieudonné (Ag.PRO)