Kuri uyu wa 29 Mata 2022; Umuyobozi w'Akarere wungirije ushinzwe Iterambere ry'ubukungu Bwana BIZIMANA Eric yayoboye igikorwa cyo gutaha ku mugaragaro ikiraro cyo mu kirere gihuza Umudugudu wa Rwabagenzi n’uwa Nyiramarangara mu Kagari ka Nyamirama, mu Murenge wa Muhanga. Iki kiraro kikaba cyarubatswe ku bufatanye na Bridge to Prosperity muri gahunda isanzwe Akarere gafatanyamo na Bridge to Prosperity yo kubaka ibiraro byo mu kirere mu rwego rwo korohereza abaturage ubuhahirane bitewe n'imiterere y'Akarere ka Muhanga yiganjemo imisozi n'imigezi.

V/Mayor ushinzwe Iterambere ry’ubukungu afungura ku mugaragaro ikiraro gihuza Umudugudu wa Rwabagenzi n’uwa Nyiramarangara

Mu butumwa yahatangiye; Umuyobozi w'Akarere wungirije ushinzwe Iterambere ry'ubukungu yashimye imikoranire Akarere gafitanye na Bridge to Prosperity mu korohereza abaturage ubuhahirane binyuze mu kubaka ibiraro byo mu kirere, aho yatanze urugero ko kwambuka uyu mugezi wubatsweho iki kiraro byagoranaga ndetse bikaba byaranateje impanuka zitandukanye zanatwaye ubuzima bw’abantu. Yasoje asaba abaturage kugira uruhare mu kugicunga neza no kukibungabunga kugira ngo gikomeze kubafasha guhahirana nta mbogamizi nk’uko byari bisanzwe, ndetse anaboneraho kubashishikariza kwitabira gahunda za Leta zitandukanye.

ANDI MAFOTO Y’UYU MUNSI

Yanditswe na:

UWINGABIRE Dieudonné (Ag.PRO)