Kuri uyu wa 17 Ukwakira 2023, Ikigo cy’Imisoro n’Amahoro ku bufatanye n’Intara y’Amajyepfo bizihije umunsi wo gushimira abasora ku rwego rw’Intara y’Amajyepfo. Ibirori by’uyu munsi byabereye mu Karere ka Gisagara ku nsanganyamatsiko igira iti: “Saba Fagitire ya EBM wubake u Rwanda."

Kuri uyu munsi wo gushimira abasora ku rwego rw’Intara, mu byiciro bine by'ibihembo byatanzwe, bitatu muri byo byatwawe n’abikorera bo mu Karere ka Muhanga.

Mu cyiciro cy’indashyikirwa mu gutanga inyemezabwishyu no gukoresha neza EBM mu Ntara y’Amajyepfo, igihembo cyatwawe na LUMINA-KABGAYI. Iyi sosiyete ikora ubucuruzi yatanze fagitire za EBM zifite agaciro k’amafaranga agera kuri miliyari imwe na miliyoni maganatatu.

Mu cyiciro cy’indashyikirwa ku misoro y’inzego z’ibanze, igihembo cyatwawe na NDAGIJIMANA ATHANASE. Yashimiwe ko yamenyekanishije kandi akishyura neza umusoro ku bukode bw’imitungo itimukanwa ufite agaciro kagera kuri miliyoni cumi n’icyenda.

UWIMANA Beatha si umucuruzi, ahubwo ni umuguzi wagiye asaba inyemezabwishyu za EBM uko agiye guhaha. Ikigo cy’imisoro n’amahoro cyamugeneye igihembo cy’indashyikirwa kuko yatse inyemezabwishyu za EBM zigera kuri 266 zifite agaciro k’amafaranga 495,120.

Mu kindi cyiciro, Sosiyete itwara amaraso ikoresheje indege zitagira abapilote zizwi nka drone, ibarizwa mu Karere MUHANGA, na yo yahembwe nk'ikigo kinjije umusoro munini aho kinjije agera kuri miliyoni 490.

Uyu munsi wahariwe gushimira abasora, watangijwe na Guverinoma y’u Rwanda nk’uburyo bwo kurushaho kuzirikana no kwibutsa akamaro k’imisoro n’amahoro mu bukungu bw’Igihugu cyacu, gushimira abitabira kuyitanga neza ndetse no gukomeza gushishikariza Abanyarwanda kwiteza imbere.