Ku itariki ya 01 Kamena, Umuyobozi w'Akarere Madamu KAYITARE Jacqueline ari kumwe n'abandi bayobozi n'inzego z'umutekano bifatanyije n'ubuyobozi, abarezi, abanyeshuri n'abize muri ACEJ-KARAMA mu gikorwa cyo kwibuka ku nshuro ya 31 Jenoside yakorewe Abatutsi mu 1994.

Mu ijambo rye, Umuyobozi w’Akarere yabanje kwihanganisha imiryango ifite ababo bigaga cyangwa abakoraga muri ACEJ-Karama bishwe muri Jenoside yakorewe Abatutsi mu 1994.

Umuyobozi w’Akarere yagize ati:”Twaje kuzirikana umubyeyi wacu NYAGATARE Joseph, abarezi bazize jenoside bakoraga hano baturera, ndetse n’abavandimwe bacu batashoboye kuyirokoka. Uyu munsi turabibuka, turabazirikana kandi tubahaye icyubahiro kibakwiye.”

Umuyobozi w’Akarere yashimiye Ubuyobozi bwa ACEJ Karama bwashyizeho umwanya wo kwibuka Abarezi n’abanyeshuri bazize Jenoside yakorewe Abatutsi mu 1994. Yavuze ko iki gikorwa gifasha abanyeshuri biga muri iri shuri kumenya amateka y’ukuri y’ibyabereye muri iki kigo ndetse bigafasha n’abize muri iki kigo kuza kubwira aba banyeshuri amateka kuko yabaye bahari.

Agaruka ku mateka y’abigaga muri iri shuri, umuyobozi w’Akarere yavuze ko kuza kwiga muri ACEJ-Karama bitari amahitamo ya mbere kuri bamwe, ahubwo ari uko ari ho honyine hashoboraga kuboneka.

Yagize ati:” Ntabwo abantu bari bananiwe kwiga mu mashuri ya Leta nk’abandi, nta n’ubwo bari babuze ubwenge bwatuma babona uko bajya kuhiga, ahubwo Politiki mbi y’iringaniza yinjije benshi muri iri shuri.” 

Umuyobozi w’Akarere yagaye ubutegetsi bubi bwatoje abanyeshuri n’abarezi gutoteza bagenzi babo kugeza n’ubwo abaturage bari baturanye na ACEJ-Karama na bo binjiye mu kigo bakajya batoteza abanyeshuri b’abatutsi.

Umuyobozi w’Akarere yasoje ubutumwa bwe, ashimira ingabo zari iza RPF-Inkotanyi zahagaritse jenoside yakorewe Abatutsi, ndetse akangurira abakuru kwigisha abakiri bato amateka y'ukuri y'Abanyarwanda.