Umuyobozi w’Akarere Madamu KAYITARE Jacqueline yasabye abagize urwego rwunganira Akarere mu gucunga umutekano (District Security Support Organ-DASSO) kuba indakemwa mu byo bakora.

Ibi Umuyobozi w’Akarere yabivuze kuri uyu wa 22 Nzeli 2021, mu nama yahuje ubuyobozi bw’Akarere, inzego z’umutekano n’abagize urwego rwa DASSO bose bakorera ku Karere no mu Mirenge yose.

Iyi nama yarigamije kurebera hamwe ingamba zo kurushaho kunoza imyitwarire yabo ndetse n’imikorere n’imikoranire nk’urwego rwunganira Akarere mu gucunga umutekano.

Umunyamabanga Nshingwabikorwa w’Akarere Bwana KANYANGIRA Ignace (I bumoso), Umuyobozi w’Akarere Mme KAYITARE Jacqueline (Hagati), Umuyobozi wa Polisi mu Karere SSP TWAHIRWA Thomas(I buryo) bitabiriye inama na DASSO

Muri iyi nama; abagize urwego rwa DASSO bibukijwe amategeko n’amabwiriza ajyanye n’inshingano zabo, harimo Itegeko ngenga No 26/2013 rishyiraho urwego rwa DASSO, Itegeko rya Perezida wa Repubulika No 101/2014, iteka rya minisitiri w’Intebe, n’amabwiriza ya Minisitiri w’Ubutegetsi bw’igihugu agenga imyitwarire y’abagize uru rwego.

Ayo mabwiriza ya Minisitiri w’Ubutegetsi bw’igihugu agena ibikwiye kuranga abagize uru rwego, akaba akubiyemo imyifatire n’imyitwarire yabo mu kazi, n’ibihano ku muntu ugize uru rwego rwa DASSO uteshutse ku nshingano ze.

Mu butumwa butandukanye Umuyobozi w’Akarere yahaye abagize uru rwego; yabasabye guhindura imyumvire n’imyitwarire, bakaba indakemwa nk’abagize urwego rushinzwe kunganira Akarere mu gucunga umutekano, bakaba inyangamugayo ndetse bakarangwa n’indangagaciro za kirazira, kandi bakagira ubushishozi mu kazi kabo ka buri munsi kugira ngo umusaruro Akarere kabatezeho ugerweho ijana ku ijana.

Yabasabye kuba ba bandebereho mu baturage, bakabegera, bagakorana na bo neza kandi bakabaha serivisi nziza, ndetse anabizeza ko Akarere kazakomeza gukora uko gashoboye, kakababonera ibyangombwa byose bikenewe bibafasha gushyira mu bikorwa inshingano zabo.

Abagize urwego rwa DASSO bakurikiye imanuro z’abayobozi

Abagize urwego rwa DASSO nyuma yo guhabwa impanuro, kungurana ibitekerezo ku miterere y’akazi kabo, imbogamizi bahura nazo n’ukuntu barushaho kunoza ibyo bashinzwe; biyemeje kuzirikana no gushyira mu bikorwa ibyo impanuro bahawe, bakanoza imikorere n’imikoranire yabo, bakarushaho kuba intangarugero no kurangwa n’ubunyamwuga mu kazi kabo ka buri munsi.

Mu bindi abagize urwego rwa DASSO basabwe kongeramo imbaraga harimo ubukangurambaga bwo kurwanya Covid19, kurwanya abakora ubucukuzi bw’amabuye y’agaciro butemewe ndetse no kurwanya ubuzererezi no gusubiza abana mu miryango.

Yanditswe na:

UWINGABIRE Dieudonné (Ag.PRO)