Iyi miryango 47 yabanaga ku buryo butemewe n’amategeko yasezeranye kuwa kabiri tariki ya 07 Ukuboza 2021 mu Murenge wa Nyabinoni, ahari habereye ibiganiro bigamije gukangurira abaturage kurushaho kwimakaza iyubahirizwa ry'ihame ry'uburinganire no kurwanya ihohoterwa rishingiye ku gitsina. Ni ibiganiro byari byateguwe ku bufatanye bw’Akarere n’Urwego rushinzwe iyubahirizwa ry’ihame ry’uburinganire n’ubwuzuzanye hagati y’abagabo n’abagore mu iterambere ry’Igihugu (GMO), byitabirwa n’inzego zitandukanye, aho umushyitsi Mukuru yari Umuyobozi wa GMO Madamu Rose RWABUHIHI.

Abayobozi batandukanye bari bitabiriye iki gikorwa

By’umwihariko muri iki gikorwa; abahagarariye inzego z’ubutabera, iz’umutekano, Inshuti z'umuryango n'Abakuru b'Imidugudu bahagarariye abandi bafatanyije gutanga ikiganiro ku ruhare rw’inzego zitandukanye mu kurwanya no gukumira ihohoterwa rishingiye ku gitsina.

Hanatanzwe umwanya, umuryango w’intangarugero ubanye neza wa Bwana BEGAMIYINKIKO Jean de Dieu na Madamu NYIRAMUKAMISHA Dative batanga ubuhamya bw’ukuntu babanye neza ndetse n’uburyo gushyira hamwe kwabo no kuzuzanya bibafsaha kwiteza imbere ndetse bakabasha no guha uburere bwiza abana babo

Nyuma y’ibiganiro bitandukanye; Umwanditsi w'Irangamimerere akaba n'Umuyobozi w’Akarere Madamu KAYITARE Jacqueline yasezeranyije ku mugaragaro imiryango 47 yabanaga ku buryo butemewe n'amategeko, harimo n’umuryango wari umaze imyaka 42 ubana ku buryo butemewe n'amategeko.

Imwe mu miryango yabanaga ku buryo butemewe n’amategeko yarasezeranye

Asoza iki gikorwa; umuyobozi wa GMO yashimiye abagize uruhare bose mu gutegura iki gikorwa, ndetse anaboneraho gushimira imiryango yateye intambwe igasezerana imbere y'amategeko, ayisaba gukomeza kuba intangarugero no gushishikariza indi miryango ikibana ku buryo butemewe n'amategeko gutera ikirenge mu cyabo igasezerana imbere y’amategeko.

Umuyobozi wa GMO Mme Rose RWABUHIHI ageza ijambo ku bitabiriye

Abaturage b’I Nyabinoni bari babukereye

Yanditswe na:

UWINGABIRE Dieudonné (Ag.PRO)