Kuri uyu wa 07 Mata 2022 nk’ahandi hose mu Gihugu, hatangiye icyumweru cy’icyunamo cyo kwibuka ku nshuro ya 28 Jenoside yakorewe Abatutsi mu 1994.

Ku rwego rw’Intara y’Amajyepfo, umuhango wo gutangiza icyumweru cy’icyunamo wabereye mu Murenge wa Nyarusange ku rwibutso rwa Jenoside yakorewe Abatutsi rwa Nyarusange, witabirwa na Guverineri w’Intara y’Amajyepfo Madamu KAYITESI Alice, ubuyobozi bw’Akarere n’abandi bayobozi mu nzego zitandukanye. Uyu muhango wabimburiwe no gushyira indabo kuri uru rwibutso, rushyinguyemo imibiri 1,677 y’Abatutsi bishwe muri Jenoside yakorewe Abatutsi mu 1994.

Mu ijambo ry'ikaze Umuyobozi w’Akarere Madamu KAYITARE Jacqueline yagejeje ku bitabiriye, yagarutse cyane ku mateka ya Jenoside yakorewe Abatutsi I Muhanga muri rusange ndetse na Nyarusange by'umwihariko, ndetse anaboneraho kugaragaza ibikorwa bitandukanye bikorwa n’Akarere mu rwego rwo kuba hafi abayirokotse batishoboye ndetse n'ibindi bigamije kurushaho kwimakaza ubumwe n'ubwiyunge.

Muri uyu muhango, abitabiriye bahawe ibiganiro bitandukanye harimo n’ikiganiro “KWIBUKA-TWAHISEMO KUBA UMWE” cyatanzwe na Sheikh Ismael KAJEGUHAKWA, cyagarutse cyane ku kugaragaza uko ingengabitekerezo ya Jenoside yashenye umuryango w'Abanyarwanda kugeza kuri Jenoside yakorewe Abatutsi mu 1994, uko nyuma ya Jenoside bataheranywe na Politiki mbi, ahubwo bagaharanira kongera kubaka ubumwe bahoranye no guteza imbere Igihugu.

Mu butumwa umushyitsi mukuru Madamu Guverineri w’Intara y’Amajyepfo yagejeje ku bitabiriye, yibanze ku kwihanganisha abarokotse Jenoside no gusaba abaturage gukomeza gushimangira ubumwe bw'Abanyarwanda no gukumira icyabuhungabanya, ndetse anasaba urubyiruko nk'imbaraga z'Igihugu, kwigira ku mateka yaranze Igihugu, bakabungabuga ubumwe bw'Abanyarwanda kandi bagakomeza kugira uruhare rufatika mu bikorwa byo kubaka Igihugu

Uyu muhango wasojwe no gukurikirana ijambo rya Nyakubahwa Perezida wa Repubulika hifashishijwe Radiyo.

Mu Midugudu yose igize Akarere ka Muhanga kandi, abaturage bahawe ikiganiro: "KWIBUKA-TWAHISEMO KUBA UMWE", bacyunguranaho ibitekerezo ndetse banakurikirana ijambo rya Nyakubahwa Perezida wa Repubulika.

Yanditswe na:

UWINGABIRE Dieudonné (Ag.PRO)