Kuri uyu wa kane, tariki ya 26 Gicurasi 2022, ku Rwibutso rwa Jenoside yakorewe Abatutsi rwa Nyarusange, habereye igikorwa cyo kwibuka ku nshuro ya 28 Jenoside yakorewe Abatutsi mu 1994. Iki gikorwa kitabiriwe na Hon. Sénateur Clothilde MUKAKARANGWA, Abadepite, Umunyamabanga Uhoraho muri Minisiteri y’Ubutegetsi bw’Igihugu Bwana DUSENGIYUMVA Samuel, Ubuyobozi bw’Akarere, IBUKA n'abandi Bayobozi mu nzego zitandukanye.

Abayobozi batandukanye bari bitabiriye iki gikorwa

Iki gikorwa, cyabanjirijwe no gushyira indabo kuri uru rwibutso, ruruhukiyemo imibiri 1677, ndetse no ku mugezi wa Nyabarongo waroshywemo Abatutsi benshi bo kuri uyu musozi mu gihe cya Jenoside yakorewe Abatutsi mu 1994.

 Umunyamabanga Uhoraho muri MINALOC Bwana DUSENGIYUMVA Samuel ashyira indabo mu Rwibutso rwa Jenoside

Umuyobozi w’Akarere Madamu KAYITARE Jacqueline ashyira indabo mu mugezi wa Nyabarongo

Mu ijambo ry'ikaze yagejeje ku mbaga yari iteraniye I Nyarusange, Umuyobozi w’Akarere yashimiye abahagaritse Jenoside, yihanganisha abayirokotse ndetse anaboneraho kubashimira ko batacitse intege kubera ibyababayeho, ahubwo bagafata iya mbere mu kwiyubakira Igihugu no kwimakaza Ubumwe n'Ubwiyunge.

Umuyobozi w’Akarere ageza ijambo ry’ikaze ku bitabiriye iki gikorwa

Mu kiganiro "KWIBUKA-TWAHISEMO KUBA UMWE" cyatanzwe na Bwana SINDAYIHEBA Phanuel, yibanze ku kugaragazaka uruhare rw'Ingengabitekerezo ya Jenoside mu gusenya ubumwe bw'Abanyarwanda kugeza kuri Jenoside yakorewe Abatutsi ndetse n'inshingano za buri wese mu kububumbatira.

Abitabiriye iki gikorwa banahawe ubuhamya na Bwana HABIYAREMYE Gratien warokokeye Jenoside ku musozi wa Nyarusange, aho yagarutse ku mateka y’itotezwa ryakorewe Abatutsi kuva mu myaka ya 1959, 1963, 1973 n'iyakurikiyeho kugeza kuri Jenoside yakorewe Abatutsi mu 1994.

Iki gikorwa cyasojwe n’ijambo ry'Umunyamabanga Uhoraho muri Minisiteri y’Ubutegetsi bw’Igihugu wari n'Umushyitsi Mukuru muri iki gikorwa, aho ytangiye yihanganisha ababuze ababo muri Jenoside yakorewe Abatutsi mu 1994 ndetse anashima abateguye n'abitabiriye iki gikorwa. Yibukije abitabiriye, ko guharanira kuba umwe ari nshingano za buri wese, kuko ari wo musingi w'ahazaza habo n'Igihugu muri rusange.

Umunyamabanga Uhoraho muri MINALOC Bwana DUSENGIYUMVA Samuel ashyira indabo mu Rwibutso rwa Jenoside

By’umwihariko yibukije urubyiruko ko ari rwo mizero y'Igihugu, bityo bakaba badakwiye gutega amatwi ababashuka, ahubwo bagashyira imbaraga mu guhashya abapfobya bakanahakana Jenoside yakorewe Abatutsi mu 1994. Yasoje ashishikariza ababa bafite amakuru y'aho imibiri y'abazize Jenoside yakorewe Abatutsi itaraboneka iri, kuyatanga, igashyingurwa mu cyubahiro.

ANDI MAFOTO YARANZE IKI GIKORWA

Yanditswe na:

UWINGABIRE Dieudonné (Ag.PRO)