Ku itariki ya 12 Mata 2024 kuri Paruwase Gatolika ya Ntarabana mu Murenge wa Rongi habereye igikorwa cyo Kwibuka ku nshuro ya 30 Jenoside yakorewe Abatutsi. Ni igikorwa cyitabiriwe na Depite KALINIJABO Barthelemy, Komite Nyobozi y’Akarere, Visi Perezida w’Inama Njyanama y’Akarere, Abajyanama mu nama Njyanama, Nyiricyubahiro Musenyeri Ntivuguruzwa Balthazar Umwepiskopi wa Diocese ya Kabgayi, Abayobozi ba IBUKA, inzego z’umutekano n’abandi.

Igikorwa cyabimburiwe no gushyira indabo mu ruzi rwa Nyabarongo mu rwego rwo kwibuka no kunamira Abatutsi bajugunywe muri uru ruzi no gushyira ibuye ry'ifatizo ahagiye kubakwa ikimenyetso (monument) igaragaza amazina y'Abatutsi baguye kuri Paruwasi ya Ntarabana.

Mu ijambo ry’ikaze, Umuyobozi w’Akarere Madamu KAYITARE Jaqueline yavuze ko kwibuka abazize Jenoside yakorewe Abatutsi mu 1994 ari ukubaha agaciro bakwiye, no gufata umwanya uhagije wo gusabana na bo. Yavuze ko Abatutsi biciwe kuri Paruwase ya Ntarabana nta numwe wabonetse ngo ashyingurwe mu cyubahiro kuko bose bajugunywe muri Nyabarongo, ashima ubutwari bw’abarokotse Jenoside bakomeje gutanga umusaruro mu iterambere ry’Igihugu kandi bagendana ibikomere. Yavuze ko bahisemo kubaho ubwabo no kuberaho ababo bazize Jenoside ndetse ashimira abarokotse Jenoside kuba baratanze imbabazi.

Yasoje ubutumwa bwe ashima ubutwari bw’ingabo zari iza RPA Inkotanyi zitanze zigahagarika Jenoside zikarokora Abatutsi bicwaga.

Mu ijambo rye, Depite Kalinijabo Barthelemy yihanganishije Abarokotse Jenoside yakorewe Abatutsi mu 1994 ndetse avuga ko Jenoside itazongera kubaho. Yashimiye Nyakubahwa Perezida wa Repubulika wayoboye urugamba rwo guhagarika Jenoside yakorerwaga Abatutsi. Yashimiye kandi abarokotse kuba bakomeje kwiyubaka ndetse abashimira kuba barahaye imbabazi ababiciye bakanangiza imitungo yabo. Yasabye urubyiruko kugira inyota yo kumenya amateka yaranze Igihugu cyabo no gutinyuka bakabaza ubuyobozi ku byo badasobanukiwe ku mateka ya Jenoside yakorewe Abatutsi mu1994. Yasoje asaba urubyiruko kurwanya abahakana n'abapfobya Jenoside yakorewe Abatutsi mu 1994