Ku itariki ya 16 Gicurasi 2025, mu Murenge wa Rugendabali habereye igikorwa cyo Kwibuka ku nshuro ya 31 Jenoside yakorewe Abatutsi mu 1994 by’umwihariko hibutswe abagore n’abana bazize Jenoside.

Ni igikorwa cyabanjirijwe no gushyira indabo mu mugezi wa Nyabarongo waroshywemo Abatutsi bo mu Murenge wa Rugendabali n’indi mirenge ituranye na wo ndetse no gushyira indabo ahubatse ikimenyetso cy'amateka.

Igikorwa kitabiriwe n'abagize Komite Nyobozi y'Akarere, Abajyanama mu nama Njyanama y’Akarere, abayobozi ba IBUKA na AVEGA ku rwego rw’Akarere, Abafatanyabikorwa b’Akarere, Inzego z’umutekano n’abandi.

Umuyobozi w’Akarere Madamu KAYITARE Jacqueline yavuze ko jenoside yakorewe Abatutsi mu 1994 ari jenoside yateguwe, ikigishwa, igatozwa bikozwe n’ubuyobozi bubi bwari buriho ndetse igashakirwa n’ingengo y’imari.

Yakomeje agira ati:” Twaje rero kuzirikana by’umwihariko ababyeyi bacu, bashiki bacu, bakuru bacu, abavandimwe, abana bacu batashoboye kurokoka jenoside.” Yavuze ko bazakomeza kwibuka abagore n’abana bazize Jenoside ndetse no kuba hafi abayirokotse.

Yavuze ko uyu munsi twibuka abacu bazize jenoside yakorewe Abatutsi ariko akaba ari n’umwanya tuzirikana amateka yaranze Igihugu cyacu, akatubera isoko tuvomamo umugambi uhamye ko ibyabaye mu gihugu cyacu bitazongera kubaho ukundi.

Umuyobozi w’Akarere yashimye ingabo zari iza RPF Inkotanyi zahagaritse jenoside yakorewe Abatutsi zikaburizamo umugambi wari wateguwe wo kurimbura Abatutsi.

Yavuze ko uyu munsi u Rwanda ruyobowe neza kandi rufite amahoro. Yagize ati:”u Rwanda ni Igihugu cyiza gifite imiyoborere myiza kandi  giha amahirwe buri wese.”

Yasoje ubutumwa bwe, asaba abagize umuryango gukomeza kuba hafi y’abato no kubaha amakuru y’ukuri ku mateka yaranze Igihugu cyacu kugira ngo twese duhuze imbaraga mu gutegura ejo hazaza h’Igihugu cyacu.