Mu Murenge wa Shyogwe habereye ibirori byo kwishimira ko imiryango 220 yikuye mu bukene ku bufatanye bw'Akarere n'Umuryango Hope of Family. Ni ibirori byitabiriwe n'Umuyobozi w'Akarere wungirije ushinzwe Iterambere ry'ubukungu Bwana BIZIMANA Erick, abayobozi b’Umuryango Hope of Family, inzego z'umutekano n'abandi. 

Mu gihe cy'imyaka itatu, abagize imiryango 220 bahawe amahugurwa ku buryo bwo kwihangira umurimo, gushyiraho amatsinda yo kwizigama, bafashijwe kandi gukora imishinga y'ubuhinzi n'ubworozi, imyuga, ubucuruzi ndetse abana bafashijwe kubona ibikoresho by'ishuri.

Ku bufatanye bw’Akarere n’Umuryango Hope of Family, abana 199 baturuka muri iyi miryango bahawe ibikoresho by’ishuri bitandukanye harimo, amakaye, amakaramu, inkweto, imyenda y’ ishuri ndetse n’ ibindi bikoresho byose umwana akenera ku ishuri, Abagenerwabikorwa 120 bose bahawe amahugurwa ku masomo atandukanye harimo: uruhare rw’ umubyeyi mu burezi bw’ umwana, ubuzima bw’ imyororokere, uburenganzira bwa muntu, kurwanya imirire mibi, gukoresha neza amafaranga mu buryo bwo gukora imishinga iciriritse ibyara inyungu.

Hagamijwe kuzamura imibereho myiza y’abagize umuryango, Imiryango 120 yahawe ubufasha bw’ amafaranga binyuze mu matsinda yo kubitsa no kugurizanya. Buri tsinda ry’abantu 20 rikaba ryarahawe amafaranga miliyoni imwe (1,000,000Rwf) kugira ngo bajye babasha kuguza amafaranga batangire gukora imirimo mito ibyara inyungu. Hari kandi n’imiryango yahisEmo ubworozi bw’amatungo magufi. 

Mu ijambo rye, Umuyobozi w'Akarere wungirije ushinzwe Iterambere ry'ubukungu BIZIMANA Erick  yashimiye Umuryango Hope of Family ku ruhare rwabo  mu gushyira mu bikorwa gahunda ya Leta yo gufasha abaturage kwivana mu bukene. Yashimiye abagize imiryango 220 ku ruhare bagize mu gukora cyane kugeza ubwo bavuye mu bukene, yasabye abagize iyi miryango gusigasira ibyagezweho, bagaharanira kurushaho kwigira.