Ku itariki ya 01 Gicurasi, Umuyobozi w'Akarere wungirije ushinzwe imibereho myiza Bwana Gilbert MUGABO ari kumwe n'inzego z'umutekano bifatanyije n'ubuyobozi n'abakozi ba Diyoseze Gatolika ya Kabgayi mu birori byo kwizihiza umunsi mpuzamahanga w'umurimo ufite insanganyamatsiko igira iti:"Ihangwa ry'Umurimo, Intego dusangiye dusangiye."

Mu butumwa yagejeje ku bitabiriye ibi birori, Umuyobozi w’Akarere wungirije ushinzwe imibereho myiza Bwana Gilbert MUGABO yavuze ko umunsi w’umurimo ari umunsi abakozi  n’abakoresha bahura bakishimira intambwe bamaze kugeraho ndetse bagafata ingamba zikwiriye kugira ngo umurimo wabo urusheho gutera imbere.

Yasabye abakozi gukunda umurimo, gukorana ubwitange, gutanga serivise inoze,kurangwa n’imyifatire myiza no gukorera ku ntego.

Yabibukije ko umurimo ukoranywe ubuhanga uhesha agaciro nyirawo ndese ukagahesha n’urwego akorera. Yashimiye Diyoseze ya Kabgayi uruhare igira mu gahanga imirimo hagamijwe guteza imbere imibereho myiza y’abaturage n’iterambere ry’igihugu muri rusange.

Umuyobozi w’Akarere wungirije Ushinzwe imibereho myiza yavuze ko gahunda ya Guverinoma y’imyaka itanu igamije kwihutisha iterambere (NST2) iteganya kongerera ubushobozi inzego zaba iza Leta cyangwa iz’abikorera kugira ngo zihutishe ihangwa ry’imirimo ndetse zirusheho gutanga serivisi nziza kandi inoze.

Asoza ubutumwa bwe, yasabye abakozi n’abakoresha kurangwa n’indangagaciro y’ubunyangamugayo, kubaka umuco w’imikoranire no kuba magirirane mu kazi kabo ka buri munsi. Kuri uyu munsi kandi Diyoseze ya Kabgayi yashyikirije ibyemezo by’ishimwe abakozi bayo bagiye mu kiruhuko cy’izabukuru.