Kuri uyu wa 25 Nzeli 2023, Umuyobozi w’ Akarere wungirije ushinzwe iterambere ry’Ubukungu Bwana BIZIMANA Erick yatangije ku mugaragaro Urugerero rw’ Inkomezabigwi, Icyiciro cya 11. Iki gikorwa kikaba cyabeye mu Murenge wa Muhanga, Akagari ka Nganzo, aho urubyiruko rwifatanyije n’abayobozi batandukanye mu gikorwa cyo kubakira umuturage utishoboye.

 Uru rugerero rukaba rufite insanganyamatsiko ivuga ngo” Duhamye umuco w’ubutore ku rugerero”

Mu butumwa yagejeje ku rubyiruko rwitabiriye urugerero rudaciye ingando, Umuyobozi w'Akarere  wungirije Ushinzwe iterambere ry'ubukungu Bwana BIZIMANA_Erick yabasabye kwiga gukorera ku gihe, gukurikiza inama bagirwa no kwita ku ndangagaciro na kirazira by'umuco Nyarwanda bazakura ku rugerero. Yabasabye kujya bafata umwanya wo kwitekerezaho bagamije kuba urubyiruko rubereye Igihugu. Yongeye kubibutsa kwirinda ibiyobyabwenge ahubwo bakibumbira mu mashyirahamwe mu rwego rwo kwiteza imbere.

Uru rubyiruko rwibukijwe ko Ubuzima bwabo ari bo babufite mu biganza, Visi Meya  ati” Mugomba kumenya ko  igihugu cyaduhaye amahirwe ahagije tuyakoreshe kugira ngo twubake ejo hacu heza.”

Bimwe mu bikorwa uru rubyiruko ruzibandaho muri iki gihe cy’Urugerero birimo guhangana n’ ibibazo bibangamiye imibereho myiza y’ Abaturage (Human Security Issues) nko gutunganya imihanda yangiritse, kubaka uturima tw’igikoni, gufasha mu kugarura abana bataye ishuri, kurwanya isuri, kubakira abatishoboye n’ibindi bikorwa bitandukanye. Uru rubyiruko kandi ruzahabwa ibiganiro ku mateka y’Urugerero mu Rwanda, n’uruhare rw’urubyiruko mu kubaka u Rwanda twifuza, itegurwa n’ishyirwa mu bikorwa rya Jenoside yakorewe abatutsi; uruhare rw’urubyiruko mu kurwanya ingengabitekerezo yayo, no guhangana n’ihakana n’ipfobya bya Jenoside yakorewe abatutsi mu 1994 n’ibindi.

Urugerero rw’ Inkomezabigwi rwatangiye kuri uyu wa 25 Nzeri 2023, rukaba ruzasozwa ku wa 18 Ukuboza 2023.