Umuyobozi w'Akarere, ari kumwe n'inzego z'umutekano n'abandi bayobozi batandukanye, yakoranye inama n'abaturage bo mu Kagari ka Kivumu, Umurenge wa Cyeza, baganira ku ngingo zitandukanye zigamije guteza imbere imibereho myiza y'abaturage, kubungabunga umutekano no gukomeza kubaka umuryango utekanye kandi utera imbere.

Mu butumwa yagejeje ku baturage, Umuyobozi w'Akarere yabashishikarije gukomeza kugira uruhare rugaragara mu kubungabunga umutekano, agaragaza ko umutekano ari wo musingi w'iterambere. Yasabye abaturage gukomeza gukorana bya hafi n'inzego z'umutekano, gutangira amakuru ku gihe no kwirinda icyahungabanya ituze n'umutekano by'aho batuye.

Abaturage kandi bibukijwe gutangira igihe umusanzu w'Ubwisungane mu Kwivuza (Mutuelle de Santé) wa 2026–2027, kugira ngo buri muturage akomeze kubona serivisi z'ubuvuzi igihe azikeneye. Basabwe kudategereza igihe ntarengwa, ahubwo bakitabira gutanga umusanzu hakiri kare kugira ngo hatagira usigara inyuma.

Mu rwego rwo gukomeza gukumira indwara z'ibyorezo, hibanzwe ku ndwara ya Ebola, abaturage basabwa gukomeza gukurikiza amabwiriza yo kwirinda, kwita ku isuku y'umuntu n'iy'ibidukikije, gukaraba intoki kenshi no kwihutira kumenyesha inzego z'ubuzima igihe hagaragaye umuntu ufite ibimenyetso bikekwa. Hibukijwe ko ubufatanye bw'abaturage ari ingenzi mu gukumira no kurwanya ibyorezo.

Umuyobozi w'Akarere yanagarutse ku kamaro ko gukora cyane no gukoresha neza amahirwe ahari kugira ngo abaturage bongere umusaruro, biteze imbere kandi barusheho kuzamura imibereho y'imiryango yabo. Yashishikarije abaturage kwitabira ibikorwa bibyara inyungu, kuzigama no gukorana mu matsinda cyangwa amakoperative kugira ngo bagere ku iterambere rirambye.

Ku bijyanye n'isuku n'isukura, abaturage basabwe gukomeza kurangwa n'isuku mu ngo, ku mihanda no mu bice rusange, kuko isuku ari imwe mu nkingi zifasha kurwanya indwara no kubungabunga ubuzima bwiza bw'abaturage.

Kubera ko amashuri ari mu biruhuko, hibanzwe cyane no kwibutsa ababyeyi n'abarezi ko bafite inshingano zo gukurikiranira hafi abana babo. Basabwe kubarinda ingeso mbi, ibiyobyabwenge, ihohoterwa n'ibindi bishobora kubashyira mu kaga, babatoza indangagaciro nziza ndetse bakabashishikariza kwitabira ibikorwa bibafitiye akamaro birimo siporo, umuco n'imirimo ibatoza gukunda umurimo.

Abaturage bahawe kandi umwanya wo gutanga ibitekerezo, ibibazo n'ibyifuzo byabo, aho basubijwe ku bibazo bitandukanye bibangamiye imibereho yabo. Basabwe gukomeza gukorana n'inzego z'ubuyobozi mu gushakira hamwe ibisubizo birambye ibibazo bibugarije.

Inama yasojwe abaturage bongera kwiyemeza gukomeza gufatanya n'ubuyobozi mu kubungabunga umutekano, guteza imbere ubuzima n'imibereho myiza, no kugira uruhare rugaragara mu bikorwa by'iterambere ry'Akarere n'Igihugu muri rusange.