Kuri uyu wa 16 Nzeli 2021; Umuyobozi w’Akarere Madamu KAYITARE Jacqueline hamwe n’inzego z’umutekano basuye Umurenge wa Kiyumba mu rwego rwo gukomeza kwegera abaturage no kubatega amatwi hagamijwe kubasobanurira ibibakorerwa.

Muri uru ruzinduko; Umuyobozi w’Akarere n’itsinda bari kumwe babanje gusura ahari kubakwa amacumbi y'abaganga ku Bitaro bya NYABIKENKE n’ahari kuvugururwa inyubako kuri TVET-Kiyumba, bashima aho imirimo y’ubwubatsi igeze ndetse banatanga inama zitandukanye zo kurushaho kwihutisha imirimo no kuyinoza neza.

Umuyobozi w’Akarere n’itsinda bajyanye basura ahari kubakwa amacumbi y’abaganga ku Bitaro bya Nyabikenke

Umuyobozi w’Akarere yanaboneyeho gukurikirana igikorwa cyo gukingira abaturage icyorezo cya Koronavirusi ku Kigo Nderabuzima cya Nyabikenke, ndetse anaganira n'abakozi b’Ikigo Nderabuzima ku mikorere n’imikoranire hagamijwe kurushaho kunoza imitangire ya serivisi.

 Umuyobozi w’Akarere ari gukurikirana igikorwa cyo gukingira abaturage icyorezo cya Koronavirusi ku Kigo Nderabuzima cya Nyabikenke

Muri uru ruzinduko kandi; Umuyobozi w’Akarere n’abari bamuherekeje bakoranye inama n’abakozi b’Umurenge ndetse n’abaturage bahagarariye ibyiciro bitandukanye mu Murenge wa Kiyumba.

Mu butumwa butandukanye yahaye abitabiriye; umuyobozi w’Akarere yabashishikarije kongera imbaraga mu gushishikariza abaturage kwitabira kwishyura ubwisungane mu kwivuza no kujya muri EJO HEZA ndetse n’izindi gahunda zitandukanye zashyizweho na Leta mu nyungu z’abaturage, cyane ko zose Leta iba yashyizemo nkunganire.

Yabasabye kandi kurushaho kwegera abaturage bahagarariye, kwita ku ikemurwa ry’ibibazo byabo, ahari icyuho cya ruswa hose hakitabwaho muri gahunda na serivisi zitandukanye hagamijwe kugera ku iterambere rirambye, ndetse no kugira uruhare mu kuzamura imyumvire y'abaturage.

By’umwihariko, yasabye abikorera kurushaho gukora ishoramari hagendewe ku mahirwe ahari n'ibikorwa remezo bishya bigenda bihashyirwa, bityo umuturage agahora ku isonga mu bimukorerwa.

Abakozi b’Umurenge n’abahagarariye ibyiciro bitandukanye bitabiriye inama n’umuyobozi w’Akarere

Yasoje asaba abitabiriye inama kutirara, bagakomeza ubukangurambaga n’ubugenzuzi ku iyubahirizwa ry’amabwiriza yo kwirinda Koronavirusi kugira ngo kizarangire, bityo ubuzima bwongere kujya ku murongo nk’uko bisanzwe.

Yanditswe na:

UWINGABIRE Dieudonné (Ag.PRO)