Ku itariki ya 27 Kamena, mu cyumba cy’inama cy’akarere; hateraniye inteko_rusange y’inama y’igihugu y’urubyiruko ku rwego rw’akarere, yitabiriwe n'urubyiruko ruhagarariye abandi mu tugari, mu mirenge no ku karere n’ibindi byiciro birimo urubyiruko rwavuye mu bigo ngororamuco rwiteje imbere. Insanganyamatsiko y’iyi nama yagiraga iti: “urubyiruko ku isonga mu kubaka u rwanda twifuza.”

Iyi nteko rusange kandi yitabiriwe n’umuyobozi w’akarere  Madamu KAYITARE Jacqueline, Umuyobozi w’akarere wungirije ushinzwe imibereho myiza Bwana Mugabo Gilbert, abanyamabanga Nshingwabikorwa b’Imirenge, abakozi bafite uburezi mu nshingano ku rwego rw’umurenge, inzego z’umutekano n’abandi.

Muri iyi nteko, hagaragajwe ibikorwa by’imihigo byakozwe n’urubyiruko mu mwaka w’ingengo y’imari wa 2024/2025, hatangwa ibiganiro bitandukanye birimo uruhare rw’urubyiruko mu gusigasira ibyagezweho, gukemura ibibazo bibangamiye imibereho myiza y’abaturage no kwimakaza umuco w’ubukorerabushake mu rubyiruko.

Muri iyi nteko rusange , hashimiwe urubyiruko rwagize  uruhare mu bikorwa bigamije iterambere ry’urubyiruko n’imibereho myiza y’abaturage.

Mu butumwa bwe Umuyobozi w’Akarere yabwiye urubyiruko  ko ejo hazaza h’u Rwanda hashingiye ko icyizere Igihugu gifitiye urubyiruko. Yavuze ko urubyiruko rwashyiriweho amahirwe yihariye kugira ngo icyizere igihugu kibafitemo kigire icyo cyubakiraho. 

Umuyobozi w’Akarere yagize ati "Abayobozi turiho turakura duzasaza, ni yo mpamvu mukwiye kwitegura kuzadusimbura, tubashoramo imbaraga kugira ngo muzabashe kugira aho mugeza Igihugu muhereye aho tukigejeje.

Umuyobozi w’Akarere yasabye urubyiruko kuva mu cyiciro cy’abatekererezwa ahubwo bakajya mu cyiciro cy’abatekerereza abandi.  Yasoje ubutumwa bwe akangurira urubyiruko kwitabira umurimo, kwemera kuba imbaraga z’Igihugu no  kwirinda ingeso mbi.