Umuyobozi w'Akarere Madamu KAYITARE Jacqueline ari kumwe n'inzego z'umutekano bifatanyije n'abahinzi bo mu Kagari ka Ruhina mu Murenge wa Kiyumba mu gikorwa cyo gutera imbuto y'imigozi y'ibijumba ku buso bungana na Hegitari 9. Mu Karere ka Muhanga biteganyijwe ko muri iki gihembwe cy'ihinga 2026B hazaterwa imbuto y'ibijumba ku buso bungana na Hegiteri 150 hagamijwe kongera umusaruro mu bwiza no mu bwinshi. 

Mu butumwa bwe, Umuyobozi w'Akarere Madamu KAYITARE Jacqueline yihanganishije Abarokotse Jenoside yakorewe Abatutsi mu 1994. Yasabye abaturage gushyira imbere Ubumwe bw'Abanyarwanda, gukorera hamwe, kwirinda amacakubiri n'ingengabitekerezo ya Jenoside. Yibukije ababyeyi ko bafite uruhare n'inshingano zo kurerera u Rwanda rw'ejo hazaza, barinda abana inyigisho mbi zigamije kugoreka amateka. Yabasabye kubigisha ukuri no gukunda Igihugu kuko u Rwanda rw'ejo ruri mu maboko yabo. Umuyobozi w'Akarere yasoje ubutumwa bwe asaba abahawe imbuto y'imigozi y'ibijumba kuyitaho no kuzoroza abandi, guhinga ubutaka bwose bwagenewe ubuhinzi, gutanga umusanzu w'ubwisungane mu kwivuza wa 2026-2027 no guhuza imbaraga hagati y'abagize umuryango.