Ku itariki ya 30 Ukuboza 2025, urubyiruko 800 rwo muri Duwayene ya Kanyanza muri Diyoseze Gatolika ya Kabgayi rwasoje Forumu y'urubyiruko yari imaze iminsi 5 ibera muri Paruwasi ya Kabacuzi, ikaba yari ifite insanganyamatsiko igira iti:"Turi abahamya b'amizero, ubuvandimwe n'amahoro."

Ni igikorwa cyitabiriwe n'Umuyobozi w'Akarere Madamu KAYITARE Jacqueline, cyabimburiwe n'Igitambo cya Misa cyayobowe na Nyiricyubahiro Mgr Balthazar NTIVUGURUZWA, Umwepiskopi wa Diyoseze ya Kabgayi.

Muri iyi Forumu, urubyiruko rwahawe inyigisho zibakangurira gukoresha neza ikoranabuhanga n'imbuga nkoranyambaga birinda ibishobora kubarangaza, kwitabira umurimo, gusigasira umutekano, gushyiraho amatsinda y'urubyiruko, kuzigama no kwitabira gufata inguzanyo mu bigo by'imari mu rwego kwiteza imbere no kwita ku isuku y'aho batuye n'aho bakorera. Urubyiruko kandi rwakanguriwe kujya rwitabira gahunda zitandukanye harimo umuganda, inteko z'abaturage n'izindi gahunda zitandukanye.

Mu butumwa bwe, Umuyobozi w’Akarere Madamu KAYITARE Jacqueline, yashimiye Diyoseze ya Kabgayi yahisemo ko buri mwaka izajya ihuza urubyiruko muri Forumu mu rwego rwo gutegura ejo heza ha Kiliziya n’ah’Igihugu. 

Yashimye amasomo atandukanye yahawe urubyiruko rwitabiriye Forumu haba ku myitwarire ikwiriye kuranga  umukirisitu no ku buzima bw’Igihugu muri rusange.

Yasabye urubyiruko kubyaza umusaruro amasomo bakuye muri iyi forumu baharanira kurangwa n’imyitwarire myiza no kuba abaturage beza b’intangarugero. 

Yavuze ko babatezeho umusaruro mu miryango bakomokamo, mu midugudu, Utugari n’Imirenge batuyemo.

Yasabye urubyiruko gutegura ejo hazaza, gushyira hamwe, gukumira icyabatandukanya, kwitabira umurimo no gukoresha neza ikoranabuhanga. 

Umuyobozi w’Akarere akaba yasoje ubutumwa bwe asaba urubyiruko kwirinda gukoresha nabi umutungo muri iki gihe cy’iminsi mikuru isoza umwaka, kwitabira igikorwa cyo gukosora imyirondoro no kwifotoza kugira ngo bazahabwe indangamuntu-Koranabuhanga ndetse yizeza Diyoseze ya Kabgayi ko bazakomeza gufatanya mu bikorwa biteza imbere imibereho myiza y’umuturage.