Ku itariki ya 09 Ukuboza 2024, kuri Stade ya Muhanga  habereye ibirori byo kwizihiza Umunsi Mpuzamahanga wahariwe kurwanya ruswa. Ibirori  byabimburiwe n’urugendo rwo kurwanya ruswa rwatangiriye ku Biro by’Akarere ka Muhanga rwerekeza kuri Stade ya Muhanga. Ni ibirori byitabiriwe n’abayobozi banyuranye barimo Guverineri w’Intara y’Amajyepfo Madamu Kayitesi Alice, Umuvunyi Mukuru Madamu Nirere Madeleine, Abavunyi bakuru bungirije, Abahagarariye Inteko Ishinga Amategeko imitwe yombi, Abajyanama mu nama Njyanama y’Akarere, Abagize Komite Nyobozi y’Akarere, Abagize inama y’umutekano itaguye ku rwego rw'Akarere, Umuyobozi w'Akarere ka Ruhango n'Umuyobozi w'Akarere ka Kamonyi, Inzego z'ubutabera, Abikorera, abanyamadini, abahagarariye inzego z'ibanze kuva ku rwego rw'umudugudu kugera ku rwego rw'Akarere, abagize Sosiyete Sivile, abaturage n’abandi.

Insanganyamatsiko y’uyu mwaka iravuga ngo:” Dufatanye n'Urubyiruko mu kurwanya ruswa: Dutegure Inyangamugayo z'ejo hazaza".

Mu ijambo yagejeje ku bitabiriye ibi birori, Guverineri w’Intara y’Amajyepfo Madamu Kayitesi Alice yavuze ko uyu munsi washyizweho n’umuryango w’Abibumbye kugira ngo Abayobozi n’Abatuye isi basuzume aho bageze bahangana n’icyorezo cya ruswa, kandi bafate ingamba zihamye zo kuyirandura burundu.

Yakomeje agita ati:” Kuba duteraniye hano ku munsi nk’uyu tuvuga ku kibazo cya ruswa, ni uko icyo kibazo gihari kikaba gihangayikishije Isi no mu Rwanda ikaba ihari n’ubwo ari nke ugereranyije n’ibihugu byinshi dusangiye umugabane w’Afurika. Igihugu cyacu cyihaye intego yo kutihanganira ruswa kubera ingaruka zayo ku iterambere ry’Igihugu, iry’abagituye n’imibereho myiza yabo.”

Yavuze kandi ko mu rwego rwo kurwanya ruswa hashyizweho ingamba zihamye zo gukumira no kurwanya ruswa: Inzego zitandukanye zishinzwe kurwanya ruswa zirimo n’Urwego rw’Umuvunyi, amategeko yaravuguruwe, ubufatanye buratera imbere hagati y’Inzego haba mu Gihugu, mu karere ndetse no mu rwego mpuzamahanga, ubushobozi bw’Abakozi bo mu Nzego zishinzwe kurwanya ruswa buriyongera, serivisi ziranozwa, hatezwa imbere gukoresha ikoranabuhanga; kandi kwigisha Abaturarwanda kumenya uburenganzira bwabo no kurwanya ruswa birakomeza.

Yasoje ubutumwa bwe ashimira inzego zose zifite mu nshingano zazo gukumira, kurwanya, kugenza no guhana ibikorwa bya ruswa, kuko zikora umurimo ukomeye ndetse asaba n’urubyiruko kwanga no kwamagana ibikorwa byose biganisha kuri ruswa.