Ku itariki ya 13 Ugushyingo, Umuyobozi w’Akarere wungirije ushinzwe iterambere ry’ubukungu Bwana BIZIMANA Erick yatangije amahugurwa y'iminsi 2 agenewe abakozi bashya bo mu Turere twa Muhanga, Ruhango, Nyaruguru, Nyanza na Gisagara yateguwe ku bufatanye bw’Uturere, Ishyirahamwe rihuza Inzego z’ibanze n’Umujyi wa Kigali (RALGA), Minisiteri y’Ubutegetsi bw’Igihugu (MINALOC) na Minisiteri y’Abakozi ba Leta n’Umurimo (MIFOTRA).

Mu minsi 2 abakozi bashya barahugurwa ku ntekerezo-shingiro y'imiyoborere y'u Rwanda, gahunda ya 2 y'Igihugu yo Kwihutisha Iterambere, Politiki yo kwegereza ubuyobozi abaturage, imitangire ya serivise, imyitwarire mbonezamurimo no gukora kinyamwuga mu bakozi ba Leta n'ibindi.

Mu butumwa bwe, Visi Meya BIZIMANA Erick yasabye abakozi bashya binjiye mu nshingano gukorana ubwitange, kurangwa n’indangagaciro ziranga umukozi wa Leta, kwigirira icyizere, gukorera hamwe, kumenya neza icyerekezo cy’Igihugu no guharanira gushyira umuturage ku isonga.